माणसं मारून विचार थोडीच संपतो हो...!!!



माणसं मारून विचार थोडीच संपतो हो,
आज मी थोडं कलबर्गी होतो...
तुमच्या अचूक नेमाइतकाच त्वेषाने फोफावेल,
आज मी थोडे खरंच बोलतो....

सांगतो शिवाजी कोण होता पुन्हा,
आज मी थोडं पानसरे होतो...
फार तर फार एका गोळीचा प्रश्न आहे ना,
तोपर्यंत आज मी थोडं जगून घेतो....

उधळून टाकू तुमचा प्रत्येक डाव,
आज मी थोडं दाभोळकर होतो...
सांडतील ना रक्ताचे दोन थेंबच,
आज मी थोडं मनातलंच बोलतो...

असली तुमची गिधाडांची टोळी,
आज मी थोडं गौरी लंकेश होतो...
अंगार नाहीत हो शब्द माझे,
आज मी थोडे शब्दच बोलतो...

गणेशदादा शितोळे

(८ सप्टेंबर २०१७)